Zaborguneen erabilera hobetzeko neurri zuzentzaileak.

Arazorik handiena birziklatze falta eta hondakinak edukiontzietatik kanpo jartzea da.

Sasieta Mankomunitateak denbora darama lanean Ormaiztegin birziklapenari eta bizilagunei kalte egiten dieten hondakinen Ordenantzaren aurkako arau-hausteak zuzendu nahian. Herritar asko kezkatuta agertu dira egoerarekin, eta kexak Udalari helarazi dizkiote.

Hiru arazo nagusi antzeman dira:

1. Asko hazi da edukiontzietatik kanpo zabor-poltsak botatzen dituzten pertsonen kopurua. Poltsa horiek, oro har, mota guztietako hondakinak izaten dituzte nahastuta, birziklatu ezin daitezkeenak. Ondorioz, zikinkeria pilatzen da puntuetan, eta azkenean zaborra puskatzen eta zabaltzen duten animaliak erakartzen ditu.
2. Asko hazi da beira, organikoa, papera, pixoihalak eta abar duten hondakin nahasiak birziklatzeko edukiontzietan sartzen dituzten erabiltzaileen kopurua, batez ere enbaseetarako edukiontzi horian.
3. Ez da errespetatzen tamaina handiko trasteak (altzariak, koltxoiak...) ateratzeko egutegia, eta, askotan, Garbigunera eraman beharko liratekeen baimendu gabeko hondakinak ateratzen dira (obra-hondakinak, pintura-poteak, objektu ebakitzaileak...).

Zumalakarregi kaleko eta Monseñor Irizarren bidegurutzeko puntuetan arazoak objektiboki handiagoak badira ere, Sasieta mankomunitateak komunikazio- eta zaintza-kanpainak udalerriko toki guztietara zabaldu ditu. Edukiontzietan eta atarietan informazio-kartelak jarri ditu, etxeko hondakinak nola bereiztu behar diren informazio orriak postontzietan banatu ditu, txartela erabiltzen ez duten etxebizitza guztietara gutunak bidali ditu eta, gainera, bisita pertsonalizatuak egiten ari da, gutun hori jaso arren, jaramonik egin ez dioten etxebizitzetara. Eta, hala ere, hainbat isun izapidetu behar izan ditu (14 isun urtarrilean soilik), gehienak zaborra birziklatzeko edukiontzietan botatzeagatik. Laster ordenantza berri bat sartuko da indarrean, isunen zenbatekoa nabarmen handitu duena.

 

Gainera, Udalak kamerak jarri ditu bilketa-gune gatazkatsuenak kontrolatzeko, Udaletxetik beharrezko zuntza zabalduz; oraingoz hori ezinezkoa da beste puntu batzuetan egitea. Horri esker, arau-hausteen detekzioa arindu ahal izango da, eta hartu beharreko neurriak pertsonalizatu ahal izango dira.

Neurri honekin batera Sasieta Mankomunitateak eta Udalak aldaketa batzuk egitea erabaki dute Monseñor Irizarreko puntua hobetzen saiatzeko, bertan egoera jasanezina baita. Udaletxe ondoan edukiontzi-puntu berri bat sortuko da, eta Gabirialde kaleko edukiontzi-puntua metro batzuk beherago lekualdatuko da, Euskadiko Kutxaren parean, Monseñor Irizarreko puntuan dagoen erabiltzaile kopurua arintzeko eta puntuak sortzaileengana hurbiltzeko. Beste leku batzuetan, edukiontzi gehiago jarri dira.

 

Kontuan izan behar dugu ordaintzen ditugun zabor-tasak oso lotuta daudela birziklatzen dugun zabor-bolumenarekin, eta, beraz, behar bezala egiten ez badugu, zerbitzuagatik ordaintzen duguna nabarmen handituko dela; jakina, ez dugu ahaztu behar birziklatzeko arrazoi nagusia: ingurumena zaintzea.

Hondakinak behar bezala kudeatzeko moduari buruz zalantzak izan ditzaketenei udaletxera edo Sasieta Mankomunitatera gerturatzera gonbidatzen zaituztegu. Bertan, xehetasunez informatuko zaituztegu eta beharrezko baliabideak emango dizkizuegu.